Kasbiy taʼlim tashkilotlarining ishlab chiqarish taʼlimi ustalariga malaka toifalarini berish yo‘lga qo‘yildi

Kasbiy taʼlim tashkilotlarining ishlab chiqarish taʼlimi ustalariga malaka toifalarini berish yo‘lga qo‘yildi

Oliy taʼlim, fan va innovatsiyalar vazirining 2025-yil 29-maydagi 202-son buyrugʻi Adliya vazirligida davlat ro‘yxatidan o‘tkazildi (https://gov.uz/oz/edu/pages/dliya-vazirligidan-royxatdan-otgan-meyoriy-hujjatlar) (raqami – 3635). Mazkur buyruq bilan Kasbiy taʼlim tashkilotlarining ishlab chiqarish taʼlimi ustalarini attestatsiyadan oʻtkazish tartibi to‘g‘risidagi nizom tasdiqlandi.

Nizomga ko‘ra:

• ishlab chiqarish taʼlimi ustalari har besh yilda bir marta malaka toifasini berish boʻyicha nazariy va amaliy imtihonlar orqali attestatsiyadan oʻtkaziladi;
• ta’lim ustalari attestatsiyada qayd etgan natijalariga qarab ularga birinchi va ikkinchi malaka toifalari beriladi;
• taʼlim ustalari oʻz xohishiga koʻra navbatdan tashqari attestatsiyadan oʻtishi mumkin. Bunda, attestatsiyadan oʻta olmagan taʼlim ustalarining malaka toifasi tushirilmaydi va ular lavozimiga muvofiq emas deb hisoblanmaydi;
• malaka toifasi ko‘tarilgan ishlab chiqarish ta’lim ustalarining oylik ish haqlari oshiriladi.

Quyidagilar navbatdagi majburiy attestatsiyaga jalb etilmaydi:

ilmiy daraja va unvonga ega bo‘lganlar;

pedagogik faoliyat bo‘yicha uch yildan kam bo‘lgan ish stajiga egalar;

homilador ayollar;

homiladorlik va tug‘ish hamda bolani parvarish qilish ta’tillarida bo‘lgan ayollar;

uch yoshgacha bola parvarishida bo‘lgan ayollar;

uzoq davolanishni o‘tayotganlar;

respublika va chet el davlatlariga o‘qishga, qayta tayyorlash va malaka oshirish kurslariga yuborilganlar va h.k.

✔️Quyidagi taʼlim ustalarining malaka toifasi to‘g‘ridan to‘g‘ri attestatsiyadan o‘tkazilmasdan bir pog‘onaga oshiriladi:

Davlat mukofotlari bilan taqdirlanganlar;

“Ustoz” milliy mukofoti g‘oliblari;

Worldskills musobaqalari sovrindorlarini tayyorlaganlar;

respublika miqyosidagi ko‘rik-tanlovlarda g‘oliblikni qo‘lga kiritgan o‘quvchilarni tayyorlaganlar.

Attestatsiyadan oʻtish har yili 1-avgustdan 1-oktyabrga qadar bevosita pedagog.edu.uz platformasi orqali amalga oshiriladi.

Malaka toifasini attestatsiyasiz oshirish istagidagi taʼlim ustalari pedagog.edu.uz platformasi orqali so‘rovnomalarni mustaqil to‘ldiradilar.